nasin sona pi sewi mama
mi tawa e nasin sewi Kemetisin. nasin sewi Kemetisin li jo e sewi mute mute. ni la, jan li anpa tawa sewi seme? jan mute la, ona li anu e ni: sewi li pona tawa ona. taso, mi tawa e nasin ante. nasin sewi Kemeti Osotosi* la, jan li ken anu ala e sewi. sewi li anu e jan. ni li tan seme? ma Masu majuna la, jan li anu ala e sewi ona. jan li anpa tawa sewi pi tomo ma ona, tawa sewi pi pali ona, tawa sewi pi kulupu mama ona. nasin sewi KO li wile pali e ijo sama ni.
jan li wile sona e sewi ona la, jan o awen lon nasin sewi KO lon tenpo mun mute, tan ni: tenpo open la, jan mute li kama tawa nasin sewi KO. ona li wile taso e ni: ona li kama sona e sewi ona. ona li kama jo e sona ni la, ona li awen ala. taso, sona pi sewi sina li suli. jan pi nasin sewi KO li wile e ni: sina sona e suli ni. kin, jan li ken open la, ona li toki tawa jan lawa pi nasin sewi KO. jan lawa li kama sona e wile sewi kepeken ilo pi sona sewi. nasin ni li pana e sewi mama e sewi olin.
jan li ken jo e sewi mama wan anu sewi mama tu. jan mute lili li pilin e ni: sewi mama ona li pali e ona. jan ale la, sewi mama li suli mute. jan en nasin sewi KO li wan la, sewi mama ona li pana e nimi tawa ona. nimi ni li toki wawa. sewi mama li wile e ni: jan li kama sona e kon nimi, li tawa e nasin ni. kin, jan li wile kama e jan sewi la, jan li pali e ni tawa sewi mama ona.
jan li ken jo e sewi olin mute. ni li ken lon: jan li jo e sewi olin wan anu sewi olin ala. taso, ni li lon tenpo mute ala. sewi olin li kama tan ni: ona li pana e pona tawa jan, li awen e jan. tenpo la, jan li ken kama sona e sewi olin sin. jan li pilin e lon sewi la, jan li ken toki tawa jan lawa lon tenpo tu. jan lawa li kepeken ilo pi sona sewi. kin, sewi ni li ken toki e ni: ona li lon anu lon ala.
sewi mama mi li tu. ona li sewi Sopeku li sewi Sete. sewi Sopeku li sewi pi ijo ni: ona li telo linja, li kasi, li unpa, li pilin soweli, li awen, li jan lawa. ona li akesi monsuta. sewi Sete li sewi pi ijo ni: ona li ma seli, li kon telo kalama, li utala, li jan pi ma nasa, li wawa pi nasin ala. soweli seme li sewi Sete? jan sona pi ma Masu majuna li sona ala.
sewi olin mi li mute. ona li sewi La, li sewi Ato, li sewi Pase, li sewi Owasu. mi toki mute tawa sewi mama mi la, mi toki lili tawa ona. taso, ona li suli kin tawa mi.